酒精搓手液, 防疫小知識
防疫小知識:酒精搓手液正確使用方法

平時出街唔少人都會用酒精搓手液為雙手除菌,但原來用酒精搓手液唔係就咁擠完同搓完,就可以有效殺菌㗎~要保持個人衛生,就必須睇睇以下嘅酒精搓手液正確使用方法啦!

1.搵唔到水同梘液嘅情況下先用

使用酒精搓手液,雖然可以有效消滅手上嘅細菌同病毒,但被殺死嘅細菌同病毒殘骸仍然會留喺雙手表面。相較之下,梘液入面含有表面活性劑,只要配合清水進行搓手嘅動作,就可以有效殺死同埋沖走晒手上嘅細菌、病毒同污垢。所以,酒精搓手液比較適合喺街上搵唔到水洗手嘅情况下使用,平時喺屋企用梘液洗手就得啦~

2. 確保酒精搓手液嘅成效

酒精成份並唔係越高越好!衞生防護中心建議大家使用含70%至80%酒精成份嘅搓手液,因為酒精成份過低會殺唔死細菌同病毒,濃度太高又會影響酒精揮發。用酒精搓手液前,亦切記要睇清楚有效使用日期,一旦使用過期酒精,有機會導致皮膚敏感㗎。

3. 使用酒精搓手液後要為皮膚保濕

酒精搓手液嘅成分帶有刺激性,成日使用嘅話會破壞皮膚嘅角質層保護屏障,令皮膚水分流失,變得乾燥。所以,使用酒精搓手液後應該搽多啲潤膚膏滋潤皮膚,避免因乾燥產生皮膚炎。

4. 使用份量

記得酒精搓手液嘅用量要有大約3至5毫升,先會有效地發揮殺菌功效。

5. 搓手技巧同時間

用酒精搓手液清潔雙手,技巧同時間要同用梘液洗手一樣,要揉搓雙手 (手掌> 手背> 指隙> 指背> 拇指> 指尖> 手腕) 最少20秒,然後等酒精自然揮發。千祈唔好即刻用紙巾抹乾雙手或用水洗手,咁樣會令殺菌功效大打折扣㗎!

建議文章

Start typing and press Enter to search

Shopping Cart